නිර්මාතෘවරු

මුල් යුගයේදී ලන්සි ජාතික සිල්වා නම් මහත්මයකු මෙම ශිල්පායතනයේ පාලනයට යොමු කරන ලද අතර සිසුන් 20 දෙනෙකු රඳවාගනිමින් දිගු පියවරකට යාමට ආරම්භක කැප කිරීම් සිදු කර ඇත. මෙයින් අමන්දානන්දයට පත් සේදර කොරනේල් රාළහාමිගේ පුනරාවතරණයවන් වූ දොන් දාවිත් විජේසිංහ කොඩිප්පිලි නම් වූ කාර්යශූර හා ප‍්‍රතාපවත් බවින් යුත් උදාර ගුරු මහත්මා මෙම ආරම්භ වූ ශිල්පායතනයේ මුල් ගුරු පදවිය හොබවමින් මෙම ශිල්පායතනයේ සංවර්ධනාත්මක කාර්යයකට අත ගසා ඇත. කඹුරුපිටියේ නගරයේ වූ එතුමාගේ අක්කර 1/4 ක පමණ භූමි භාගයක් වන සුන්දර කඳු ගැටයක් මත අඩි 60×20 ප‍්‍රමාණයේ ගොඩනැගිල්ලක්ද මෙම පාසල වෙනුවෙන් තනවා නාරන්දෙණිය යසේවත්ත හි අකුරු කරවූ මෙම ශිල්පායතනය මෙම ස්ථානයේ ස්ථාන ගත කර ඇත. එකල නූගත් ජනයාගේ ගෙන් ගෙට ගොස්, ශිල්ප හදෑරීම සඳහා සිසුන් සංඛ්‍යාව වර්ධනය කරමින් මෙම විද්‍යාලය වෙනුවෙන් සැකසූ අඩිතාලම කෙසේවත් මිල කළ නොහැක. 1906 දී එතුමා මෙම පාඨශාලාවෙන් අස්ව යාමත් සමග මෙහි මුල්ගුරු පදවිය පතළ කීර්තිමත් නාමයෙන් යුත් ටී. ඞී. එන්. සමරනායක මැතිඳුන් විසින් හොබවන ලදී. මෙතුමා විසින් පාසල, පන්සල හා ගම එකතු කරමින් ගම්වාසී ප‍්‍රභූන් මෙහෙයවමින් විද්‍යාර්ථීන්ගේ උද්යෝගය තව තවත් මතු කරමින් සිය අප‍්‍රතිහත ධෛර්යය මෙම පාසල ගොඩනගන්නට කැප කොට ඇත. එහි ඵලයක් ලෙස එවක කඹුරුපිටිය ප‍්‍රදේශයේ ශ්‍රේෂ්ඨ ප‍්‍රභූ පවුලක ඞී. ජේ. විජේසිංහ රාළහාමි නම් වූ දානපති මැතිඳාණන් මෙහෙයවා ගනිමින් මෙම පාසල පිරිමි පාසලක් ලෙසින් දියුණු පමුණු කර ගන්නට කටයුතු කර ඇත. මුල් ගුරු සමරනායක මැතිඳාණන් සිය පාලන කාලයේ දී විදුහලකට අවශ්‍යම වන්නා වූ මානව හා භෞතික සම්පත් සම්පාදනය කරන්නට උත්සාහ ගෙන ඇත.